زیرەکی دەستکرد لەم ساڵانەی دواییدا زۆر بە خێرایی گەشەی کردووە. پێشبینی دەکرێت لە 5 ساڵی داهاتوودا (2025-2030) پێشکەوتنی نوێ و گرنگی تر بەخۆیەوە ببینێت. شێوازی ژیانی هەموو کایەکانی ژیانمان دەگۆڕێت، لەوانە: ژیانی کەسی، ژیانی ئەکادیمی و پڕۆفیشناڵ، ژیانی کۆمەڵایەتی.
لێرەدا باس لە گرنگترین ئەو بوارانە دەکەین کە دەکرێت زیرەکی دەستکرد لە ماوەی 5 ساڵی داهاتوودا کاریگەری گەورەیان لەسەر جێبهێڵێت.
1- کار کردن و هەلی کار:
زیرەکی دەستکرد چۆنێتی کار کردنمان دەگۆڕێت و زۆربەی کارەکانمان دەکات بە خۆکاری (ئۆتۆماتیک).
– بە ئۆتۆماتیکی کردنی ئەرکە دووبارە بووەکان: زیرەکی دەستکرد بەراورد بە مرۆڤ خێراتر کار لەگەڵ ئیمەیڵ و درووستکردنی ڕاپۆرت و تۆمار کردنی زانیاری دەکات.
– ئامرازەکانی وەک Chat GPT و کۆپایلت و جێمینای بە شێوازێکی پڕۆفیشناڵ وەک یاریدەدەر ڕۆڵ دەگێڕن لە بوارەکانی کۆدینگ و بە بازاڕی کردن و نووسین و توێژینەوە.
– ڕاستە پێشبینی دەکرێت زیرەکی دەستکرد هەندێک هەلی کار کەم بکاتەوە، بەڵام دەبێت ئەوەش بزانین لە ئێستا و لە ماوەی چەند ساڵی داهاتوودا کار کردن لە بوارەکانی زیرەکی وەک ڕاهێنەری زیرەکی دەستکرد، ئەندازیاری زیرەکی دەستکرد یەکێک دەبن لە گرنگترین هەلی کارەکان.
نموونە: لە ئێستادا کۆپایلت لە مایکرۆسۆفت وۆرد و ئێکسڵ و تیمز بەردەستە کە بە شێوازێکی خۆکارانە ڕاپۆرت دەنوسێت و زانیارییەکان کورت دەکاتەوە.
2- خوێندن و فێربوون:
زیرەکی دەستکرد لە ئێستادا ڕۆڵێکی زۆر گرنگ لە بواری خوێندن و فێربوون دەبینێت و پێشبینی دەکرێت لە ساڵەکانی داهاتووشدا زۆر زیاتر بێت.
– مامۆستای کەسی: لە ئێستادا زیرەکی دەستکرد بۆ قوتابی ڕۆڵی مامۆستای کەسی دەبینێت بەوەی کە دەتوانێت بابەتەکانی بە تایبەت بۆ شی بکاتەوە لەسەر بنەمای زانینی خوێندکارەکە.
– فێربوونی زمان: لە ئێستادا چەندین پلاتفۆرم هەیە بۆ فێربوونی زمانە و بە زیرەکی دەستکرد ڕاهێنانی پێکراوە و بێگومان لە ساڵانی داهاتوودا زۆر زیاتر دەبێت.
نموونە: پێشبینی دەکرێت تاوەکو ساڵی 2030 زیرەکی دەستکرد جگە لە فێرکردن ڕۆڵی پشتگیری کردن و لایەنی ئەخلاقی بۆ خوێندکار ببینێت.
3- تەندرووستی:
زیرەکی دەستکرد یارمەتی لایەنی تەندروستی دەدات بە شێوەیەکی خێراتر و هەرزانتر کار بکەن.
– دیاری کردن (تشخیص) بە زیرەکی دەستکرد:
پێشبینی دەکرێت زیرەکی دەستکرد لە چەند ساڵی داهاتوودا زیاتر پێش بکەوێت لە دیاری کردنی نەخۆشییەکان بە خوێندنەوەی خێرایی پشکنینی خوێن و خوێندنەوەی ئەنجامی تیشکەکان ( X-ray, CT Scan, etc…).
– دۆزینەوەی دەرمان: لە ئێستادا زیرەکی دەستکرد بەکار دەهێنرێت بۆ دۆزینەوەی دەرمانی نوێ بە پێشبینی کردنی پێکهاتەی دەرمانەکە و پێشبینی دەکرێت لە داهاتوودا زۆر سوودی لێ وەربگیرێت. (پێشووتر دۆزینەوەی دەرمانێکی نوێ تاوەکو بە بازاڕ کردنی 10 بۆ 12 ساڵی دەویست، پێشبینی دەکرێت زیرەکی دەستکرد ئەم کاتە زۆر کەم بکاتەوە).
نموونە: زیرەکی دەستکردی DeepMind’s AlphaFold لە ئێستادا پێشبینی پێکهاتەی 200 ملیۆن پرۆتینی کردووە کە زۆر گرنگن لە پەرەپێدانی دەرماندا.
4- ژیانی ڕۆژانە:
زیرەکی دەستکرد لە ئێستادا بە شێوەیەکی زۆر قوڵ تێکەڵی ژیانی ڕۆژانەمان بووە و پێشبینی دەکرێت ساڵ لە دوای ساڵ زیاتر ببێت.
– یاریدەدەری کەسی زیرەکی دەستکرد: زیرەکی دەستکرد دەتوانێت ئیمەیڵت بۆ بنوسێت و بازاڕیت بۆ بکات.
– وەرگێڕانی ڕاستەوخۆ: لە ڕێگەی زیرەکی دەستکرد دەتوانیت لەگەڵ هەر کەسێک کە زمانەکەی جیاوازە قسە بکەیت لەبەر ئەوەی ڕاستەوخۆ وەرگێڕانت بۆ ئەنجام دەدات.
نموونە: یاریدەدەری کەسی جێمینای ئێستا لە مۆبایلەکان بەردەستە و چەندین کار ئاسانیت بۆ دەکات. پێشبینی دەکرێت لە چەند ساڵی داهاتوودا بە تەواوەتی ببێت بە یاریدەدەرێکی کەسی سەرکەوتوو.
5- گواستنەوە:
زیرەکی دەستکرد گواستنەوە خێراتر و باشتر دەکات.
– ئۆتۆمبێلی خۆلێخوڕ: پێشبینی دەکرێت ئۆتۆمبێلە خۆلێخوڕەکان لە چەند ساڵی داهاتوودا ببن بە سەرەکیترین ئۆتۆمبێلەکان.
– گەیاندن: خواردن و شتومەک و تەنانەت پێداویستی پزیشکیش لە ڕێگەی درۆنی بە زیرەکی دەستکرد بەهێز کراو دەگەیندرێن.
نموونە: کۆمپانیایەکی وەک ئامازۆن ئۆتۆمبێلی خۆلێخوڕ یان درۆن بەکار دەهێنن بۆ گواستنەوەی شتومەک.
ئەمانە و چەندین لایەنی دیکەی ژیان دەکرێت لە لایەن زیرەکی دەستکردەوە کاریان تێبکرێت لە داهاتوودا.
from کەی ئای تی ئێن https://ift.tt/GALcOnj
via IFTTT
0 تێبینیەکان