زیاتر لە ١٠ ئەپی پێویست بۆ مانگی ڕەمەزان!

سوپاس بۆ خوا ئەمساڵیش گەیشتین بە مانگی ڕەمەزانی پیرۆز. بۆ ئەوەی ڕەمەزانێکی بەرهەمدارترمان هەبێت و لە عیبادەت کردن نەوەستین لە هەر کوێیەک بین، چەند ئەپێکمان ئامادە کردووە کە بە ئێوەی خۆشەویست.

– تەفسیری نوور (ئەندرۆید)

یەکێکە لە ئەپە زۆر تایبەتەکان کە پەرەپێدەرەکەی کوردە، بەڵام بە داخەوە تەنها لەسەر سیستەمی ئەندرۆید بەردەستە. ئەتوانم بڵێم ئەپەکە هەموو بابەتێکی ئاینی ئیسلام لە خۆ ئەگرێت. وەک، قورئان، فەرموودە، تەفسیری قورئان بە چەند زمانی جیاواز، زیکرەکان، خوێندنەوەی قورئان بە شێوەی دەنگی، کاتەکانی بانگ بۆ هەموو شار و شارۆچکەکانی کوردستان و فەرهەنگی وشەکانیش لە خۆ ئەگرێت. تەنها بە باسکردنی لێرەدا ناتوانم حەقی تەواوەتی پێ بدەم، بۆیە ئەپەکە دابەزێنە و تاقی بکەوە.

– نور (ئەندرۆید و iOS)

ئەم ئەپەش بە شێوەیەکی گشتی هەموو بەشەکان لە خۆ دەگرێت، وەک کاتەکانی بانگی شارەکانی کوردستان و شارەکانی دیکەی جیهان، قورئانی پیرۆز، تەفسیری بە شێوەزاری سۆرانی و بادینی، زیکرەکان، فەرموودە، کتێبخانە، شیکردنەوە و باس کردنی بابەتە جیاوازەکان، قیبلەنما و زۆر شتی دیکە.

– کاتەکانی بانگ (ئەندرۆید و iOS)

سەرنجی سەرەکی ئەپەکە لەسەر کاتەکانی بانگە کە زۆربەی شارەکانی جیهانی تێدایە بە کوردستانیشەوە، هەورەها بەشی زیکر، ناوەکانی خودا و قیبلەنماش لە خۆ ئەگرێت.

– بانگ (ئەندرۆید و iOS)

بەهەمان شێوەی ئەپەکەی پێشووترە کە باسمان کرد، ئەم ئەپەش سەرنجی سەرەکی لەسەر کاتەکانی بانگە و کاتی بانگی هەموو شار و شارۆچکەکانی کوردستان لە خۆ ئەگرێت، جگە لەوەش، قورئانی پیرۆز، قیبلەنما و نزاکان (دووعاکان)ـی قورئانیش لە خۆ ئەگرێت.

– Tarteel (ئەندرۆید و iOS)

ئەپەکە تایبەت بە لەبەرکردنی قورئانی پیرۆز بە شێوەی تەجوید. ئەپەکە زۆر هاوکاریت دەکات و هەموو هەڵەکانت بۆ دیاری دەکات، هەروەها بە ژیری دەستکرد بەهێز کراوە و ئەو بەشانەت بۆ دیاری دەکات کە لە بیرت چووەتەوە یان هەڵەت لێ کردووە. هەروەها هەموو پێشکەوتنەکانت تۆمار دەکات و بۆ ئەوەی بیرت نەچێت کە کۆتا جار لە کوێ وەستایت.

– Al Quran (ئەندرۆید و iOS)

ئەپەکە تایبەتە خوێندنەوەی قورئان، بەڵام هەر ئەپێکی سادە نییە. بەڵکو قورئانی پیرۆزی بە چەند ڕووپەری جیاواز تێدایە، هەروەها وەرگێڕانی وشە بە وشە و چەندین تەفسیری قورئانیش بە زمانی جیاواز و تەنانەت زمانی کوردیش. جگە لەوەش دەتوانیت بە دەنگ گوێ لە قورئان بگریت و دواین خوێندنەوەکانت دەستنیشان بکەیت تاکو بۆ جاری داهاتوو لە هەمان شوێنەوە بەردەوام بیت.

– Deen (ئەندرۆید و iOS)

ئەمەش یەکێکە لە ئەپە گشتگیرەکانی دیکە، کە ڕووکارەکەی زۆر سەردەمییانەیە. بەشی قورئان لە خۆ دەگرێت بە خوێندنەوەی دەنگییەوە. هەروەها بەشی نزا (دوعا) کردنی هەیە. ئەپەکە بەشێکی زۆر سەرنج ڕاکێشی هەیە کە زۆرێک لە بابەتە ئاینییەکانی تێدا شیکراوەتەوە بە بەڵگەی قورئان و فەرموودە. جگە لەوانەش، کاتەکانی بانگ و قیبلەنماش لە ئەپەکە بوونی هەیە.

* تێبینی: کاتەکانی بانگی شارەکانی کوردستانی ڕاست نییە، بۆیە پشتی پێ مەبەستن لەو ڕووەوە.

– تەفسیرە کوردییەکان

سوپاس بۆ خوا کە زۆرێک لە تەفسیرە کوردییەکان ئێستا بە شێوە ئەپ لەسەر هەردوو سیستەمی ئەندرۆید و iOS بەردەستن، وە زۆربەشییان خوێندنەوەی قورئان بە دەنگ لە خۆ دەگرن بە دەنگی قورئانخوێنی کورد و بیانییەکان.
ئەمەش چەند تەفسیرێکی کوردییە دەتوانن سوودی لێ ببینن:
– تەفسیری تەوحید (ئەندرۆید، iOS)
– تەفسیری باران (ئەندرۆید، iOS)
– تەفسیری ئاسان (ئەندرۆید، iOS)
– تەفسیری پێشین (ئەندرۆید، iOS)
– تەفسیری ڕامان (ئەندرۆید، iOS)
– تەفسیری مویەسەر (ئەندرۆید، iOS)