بڕیاری کڕینی مۆبایلێکی کۆن یان مۆبایلێکی نوێی ئاست مامناوەند بەندە بە چەند هۆکارێکەوە. لەوانە، بودجەی خۆت یان ئەو پارەیەی کە دەتەوێت خەرجی بکەیت لە کڕینی مۆبایلێکدا، و ئەو تایبەتمەندیانەی کە لە مۆبایلێکدا بەدوایاندا دەگەڕێیت و چۆن پلانت هەیە بەکاری بهێنیت.
سەرەتا گرنگە بودجەی خۆت لەبەرچاو بگریت. مۆبایلە (ئاست بەرز یان فلاگشیپ)ـە کۆنەکان بەزۆری نرخیان گونجاوترە لە چاو هاوتا نوێیەکانیان یان دروستتر بڵێم فلاگشیپە نوێیەکان، چونکە ماوەیەک لە بازاڕدا بوونیان هەبووە و لە ئێستادا نرخەکانیان دابەزیوە. لە لایەکی دیکەوە مۆبایلە نوێیە ئاست مامناوەندەکان (مید ڕەینج) تایبەتمەندی پێشکەوتووتر و نوێترین ڕەقەکاڵا Hardware پێشکەش دەکەن بە نرخێکی کەمتر لە مۆبایلە پێشەنگەکان. ئەگەر بەدوای مۆبایلێکدا دەگەڕێیت کە تێچوویەکی زۆری نەبێت، ڕەنگە مۆبایلێکی نوێی ئاست مامناوەند بژاردەیەکی باشتر بێت بۆت، بە چاوپۆشین لەوەی کە چەندین تایبەتمەندی دیکەی شاراوە هەن کە پێویستە بیزانین پێش کڕینی مۆبایلەکە.
هۆکارێکی دیکە کە دەبێت لەبەرچاو بگیرێت ئەو تایبەتمەندیانەن کە لە مۆبایلێکدا بەدوایاندا دەگەڕێیت. زۆرجار مۆبایلە پێشەنگە (فڵاگشیپە) کۆنەکان ڕەقەکاڵای پێشکەوتووتریان هەیە، وەک ڕوونمای (شاشەی) ڕوونی بەرزتر و پڕۆسێسەری بەهێزتر و ڕامی زیاتر بە بەراورد بە مۆبایلە نوێیە ئاست ماناوەندەکان، بەڵام مۆبایلە نوێیە ئاست مامناوەندەکان بە گشتی نوێترن و نوێترین تایبەتمەندی و نوێکارییەکانی نەرمەواڵە (سیستەم) پێشکەش دەکەن.
ئەگەر بەدوای مۆبایلێکدا دەگەڕێیت کە نوێترین و نایابترین تایبەتمەندی هەبێت و زۆرترین جار نوێکردنەوەی سیستەمی وەگەڕخەر یان ئاسایشی مانگانەی پێبگات، لەوانەیە مۆبایلێکی نوێی ئاستی مامناوەند بژاردەیەکی باشتر بێت بۆ تۆ. بێگومان ئەمەش بە چاوپۆشین لەوەی کە ئاست بەرزەکان تایبەتمەندی زۆر گونجاوتریان تێدا بەردەست کراوە لە پێشتردا. وەک، کامێرای باشتر و ڕوونمایەک بە نوێبوونەوەیەکی خێراتر و نەرمتر و جۆرایەتی (کوالێتی) درووستکردنی ئاست بەرزتر.
ئێستا گرنگە بیر لەوە بکەیتەوە کە چۆن پلانت هەیە مۆبایلەکەت بەکاربهێنیت. ئەگەر کەسێک بیت کە پێویستت بە مۆبایلێکە بۆ بەکارهێنانی قورس، وەک یاریکردن، وێنەگرتن، یان دەستکاریکردنی ڤیدیۆ، ڕەنگە مۆبایلێکی نوێی ئاست مامناوەند نەتوانێت لەگەڵ داواکارییەکانت بگونجێت. لە لایەکی ترەوە ئەگەر کەسێک بیت کە تەنها پێویستت بە مۆبایلێکە بۆ ئەرکە سەرەتاییەکان، وەک نامە ناردن و ئیمەیڵ و گەڕان بە وێبدا، ئەوا مۆبایلێکی نوێی ئاست مامناوەند باشترە چونکە وەک ئاماژەم پێدا نوێکردنەوەی سیستمی وەگەڕخەر و ئاسایشی بۆ ماوەیەکی زیاتر پێدەگات کە دەگاتە چوار ساڵ دوای کڕینی مۆبایلەکە.
بەپوختی، هەڵبژاردنەکە بەندە بە بودجەی خۆت و ئەو تایبەتمەندیانەی کە لە مۆبایلێکدا بەدوایاندا دەگەڕێیت و چۆن پلانت هەیە بۆ بەکارهێنانی. ئەگەر بەدوای بژاردەیەکی گونجاودا دەگەڕێیت کە نوێترین تایبەتمەندی و نەرمەواڵەکانی تێدابێت، ڕەنگە مۆبایلێکی نوێی ئاستی مامناوەند باشترین هەڵبژاردەت بێت. لەبەرامبەردا ئەگەر بەدوای مۆبایلێکدا دەگەڕێیت کە ڕەقەکاڵای پێشکەوتووی هەبێت، ڕەنگە مۆبایلێکی کۆنی پێشەنگ بژاردەیەکی باشتر بێت.
تێبینی: ئەمە تێڕوانینی تایبەتی نوسەرە و لە ئەزموونی کەسی خۆیەوە ئەمەی سەرەوەی لەگەڵ ئێوە بەشکردووە. ئاساییە تۆ تێڕوانین و بۆچوونێکی جیاوازترت هەبێت.
from کەی ئای تی ئێن https://ift.tt/YcJuPAk
via IFTTT
