ئەمڕۆ کۆمپانیای شاومی کۆنگرەی بەست لە وڵاتی چین بۆ نمایش کردنی نوێترین مۆبایلی خۆی لە زنجیرەی سەرەکی و ئاست بەرزی (Mi) و مۆبایلە نوێیەکەی بەناوی Mi 11 نمایش کرد و کۆمپانیاکە بە فەرمی ڕایگەیاندووە بەمزووانە کۆنگرەیەکی دیکە دەبەستێت بۆ نمایش کردنی مۆبایلەکە لە جۆری جیهانی و گڵۆباڵ
سەرەتا با لە ڕوونمای مۆبایلەکەوە دەست پێ بکەین و یەکێک لە باشترین جۆری ڕوونماکانی مۆبایلە زیرەکەکانی لەسەر جێگیر کراوە و قەبارەی ڕوونماکەی بریتییە لە 6.81 ئینج لە جۆری OLED بە ڕوونی +QHD و تێکڕای نوێ بوونەوەی 120 هێرتز و تێکڕای وەڵامدانەوەی دەست لێدانی 480 هێرتز و ڕووناکی تاوەکو 1500 نێت و 515 پێکسڵ لە هەر ئینجێکدا و تەکنەلۆژیای +HDR10 و بە پارێزەری شووشەیی Gorilla Glass Victus ڕووپۆش کراوە
هەروەها یەکەمین مۆبایلی جیهانە کە چیپسێتی نوێی کۆمپانیای کواڵکۆمی بە بناغەی 5 نانۆمەترییەوە لەسەر جێگیر کرابێت کە سناپدراگۆن 888ـە و جۆری ڕامی مۆبایلەکە لە جۆری LPDDR5ـە و جۆری بیرگەکەی لە جۆری UFS 3.1ـە، هەروەها بە بیرگەی 128 گێگابایت و 256 گێگابایت و ڕامی 8 گێگابایت و 12 گێگابایت بەردەست دەخرێت
هەروەها خاوەن پاترییەکی قەبارە 4,600 مللی ئەمپێر.کاتژمێرییە و پشتگیری بارگاوی کەرەوەی خێرا بە هێزی 55 وات دەکات کە تەواوی پاتری مۆبایلەکە بارگاوی دەکاتەوە لە ماوەی 45 خوولەک و پشتگیری بارگاوی کەرەوەی خێرای بێتەل بەهێزی 50 وات دەکات کە تەواوی پاتری مۆبایلەکە بارگاوی دەکاتەوە لە ماوەی 53 خوولەک و پشتگیری بارگاوی کەرەوەی پێچەوانە دەکاتەوە بە هێزی 10 وات بۆ بارگاوی کردنەوەی ئامێری ئەلیکترۆنی تر وەک مۆبایل و کاتژمێری زیرەک و بیستۆک و هتد…
هەروەها لە دواوەیدا خاوەن 3 کامێرایە بە ڕوونی 108 مێگاپێکسڵ کامێرای سەرەکی و 13 مێگاپێکسڵ بۆ کامێرای گۆشە فراوان و 5 مێگاپێکسڵ بۆ ماکرۆ، هەروەها کامێرای سێڵفی بە ڕوونی 20 مێگاپێکسڵ لە شێوەی چاڵ لە پێشەوەیدا جێگیر کراوە و خاوەن هەستەوەری پەنجەمۆرە لە ژێر ڕوونماکەیدا و توانای هەیە بە ڕوونی 8K ڤیدیۆ تۆمار بکات و بڵندگۆی Stereo لە خۆ دەگرێت کە لە لایەن کۆمپانیای بەناوبانگ Harman Kardonـەوە بەرهەم هێنراوە و کەلەی بارگاوی کەرەوە لەناو پاکەتی مۆبایلەکەدا بوونی نابێت و بەجیا و بەنرخی 15 دۆلار دەبێت بکڕدرێت
هەروەها کۆمپانیای شاومی ڕووکاری بەکارهێنەری MIUI 12.5 بە هەندێک گۆڕانکارییەوە ڕاگەیاند و لەسەر مۆبایلەکە جێگیری دەکات کە بنەچەکراوە لەسەر ئەندرۆید 11 و نرخی دەستپێکی مۆبایلەکە بریتییە لە CNY 3,999 کە بە نزیکی دەکاتە 612 دۆلار بۆ بیرگەی 128 گێگابایت و ڕامی 8 گێگابایت و نرخی CNY 4,299 کە بە نزیکی دەکاتە 657 دۆلار بۆ بیرگەی 256 گێگابایت و ڕامی 8 گێگابایت و نرخی CNY 4,699 کە بە نزیکی دەکاتە 719 دۆلار بۆ بیرگەی 256 گێگابایت و ڕامی 12 گێگابایت
from کەی ئای تی ئێن https://ift.tt/3aR1hFE
via IFTTT
